Euskal ekonomiaren martxan eragin handia izaten ari dira EBko Next Generation planaren Suspertze eta Erresilientzia Mekanismoaren funts europarrak. Maiatzera arte, Euskadik 3.962 milioi euro jaso ditu, eta horietatik 1.300 milioi kudeatu ditu Eusko Jaurlaritzak, % 80,2ko egikaritze-tasarekin.
Euskadi da nagusi funts horien kudeaketaren eraginkortasunean, deialdiak ebazteko tasa % 75,4koa baita (estatuko % 68ren aldean). Gainera, esleitutako funtsen % 43 ETEetara eta mikroenpresetara bideratu dira, bidezko banaketa bermatuz.
Halaber, Euskadik 1.422 milioi euro bildu ditu ESEPEetan, Estatuko guztizkoaren % 8,1, 456,5 milioi gehiago abenduarekin alderatuta. Datu horrek agerian uzten du euskal enpresen lehiarako gaitasuna eta proaktibitatea, lizitazio eta proiektuetan estatuko batez bestekoaren gainetik baitaude.
ESEPEak Berreskurapen eta Eraldaketa Ekonomikorako Proiektu Estrategikoak dira, Suspertze, Eraldaketa eta Erresilientzia Planean integratzen direnak. Estatuko tresna horretara bideratzen dira Suspertze eta Erresilientzia Mekanismoaren funtsak, hori izanik COVID-19aren pandemiak kolpatu ondoren Europar Batasuneko Susperraldi Ekonomikorako Europako Batzordeak 2020tik abiarazitako Next Generation EU planaren osagai nagusia.
Industriari dagokionez, Industri Produkzioaren Indizea urte batetik bestera % 1,9 hazi zen maiatzean. Hazkundea beste sektore batzuetan baino apalagoa bada ere, Europako adierazleek hobekuntza txiki bat adierazten dute, euroguneko PMIaren (Erosketa-Kudeatzaileen Adierazlearen) gorakadarekin (51 puntu) bat etorriz, Alemania suspertzen ari baita.
Langabezia-tasa % 5,7ra jaitsi da Euskadin, eta Europar Batasuneko batez bestekoaren azpitik geratu da. Horrela, Autonomia Erkidegoak sendotu egin du bere posizioa, Europako lan-adierazlerik onenetakoa duen eskualde gisa.
Faktore guztiak aztertuta, Eusko Jaurlaritzak ikuspegi positiboari eusten dio datozen urteetarako, 2025erako % 2,1eko hazkunde-aurreikuspenarekin eta 2026rako % 1,7koarekin. Horrek esan nahi du datorren urterako beheranzko berrikuspen txiki bat egingo dela, eurogunean desazelerazio-aurreikuspena baitago.
Estatu Batuen eta Europaren arteko akordio berriak, Europako esportazioei % 15eko muga-zerga unibertsala ezartzen dienak, egonkortasuna ekar lezake euskal enpresek inbertsio berriak planifikatu ahal izateko.
Ikus informazio osoa (Iturria: Eusko Jaurlaritzaren Irekia webgunea)
EIES - Europako informazioaren Euskal Sarea: Europako gaurkotasuneko beste edukietarako sarbidea
